កាលពីថ្ងៃអង្គារ ៩សីហា រុស្ស៊ីបានបាញ់បង្ហោះផ្កាយរណបមួយគ្រឿងរបស់អ៊ីរ៉ង់ ទៅដាក់ក្នុងគន្លងតារាវិថីប្រកបដោយជោគជ័យ។ បេសកកម្ម ដែលទាំងរុស្ស៊ី និងទាំងអ៊ីរ៉ង់ សុទ្ធតែបាននាំគ្នាគូសបញ្ជាក់ អំពីចំណុចរបត់នៃកិច្ចសហប្រតិបត្តិការ រវាងប្រទេសទាំងពីរ នៅក្នុងវិស័យអវកាស។ ក៏ប៉ុន្តែ សហរដ្ឋអាមេរិកវិញបានសម្តែងនូវក្តីព្រួយបារម្ភ ជុំវិញការណ៍ដែលរុស្ស៊ីបាញ់បង្ហោះផ្កាយរណបរបស់អ៊ីរ៉ង់នេះ។ តើហេតុអ្វីបានជាអាមេរិកត្រូវបារម្ភនឹងរឿងនេះ?
ការបាញ់បង្ហោះផ្កាយរណបរបស់អ៊ីរ៉ង់ កាលពីថ្ងៃអង្គារនេះ ត្រូវបានធ្វើឡើង ដោយប្រើរ៉ុកកែតធុនសូយូសរបស់រុស្ស៊ី បាញ់ចេញពីមជ្ឈមណ្ឌលអវកាសបៃកូនួរ ដែលស្ថិតនៅក្នុងទឹកដីកាហ្សាក់ស្ថាន។ ក្រោយពេលបង្ហោះ ទីភ្នាក់ងារអវកាសរុស្ស៊ីបានបញ្ជាក់ពីជោគជ័យនៃបេសកកម្មនេះ ដោយផ្កាយរណបរបស់អ៊ីរ៉ង់ត្រូវបានបង្ហោះយកទៅដាក់ក្នុងគន្លងតារាវិថី ទៅតាមអ្វីដែលគេចង់បាន។
ថ្លែងពីមជ្ឈមណ្ឌលអវកាសបៃកូនួរ ប្រមុខទីភ្នាក់ងារអវកាសរុស្ស៊ី និងរដ្ឋមន្រ្តីក្រសួងទូរគមនាគមន៍អ៊ីរ៉ង់ បាននាំគ្នាគូសបញ្ជាក់ថា ជោគជ័យក្នុងការបាញ់បង្ហោះផ្កាយរណបនេះ គឺជាជំហានដ៏សំខាន់មួយ នៅក្នុងទំនាក់ទំនងទ្វេភាគី រុស្ស៊ី-អ៊ីរ៉ង់ ហើយថា វាជាការបើកផ្លូវ ឆ្ពោះទៅកិច្ចសហប្រតិបត្តិការក្នុងគម្រោងថ្មីៗ និងធំៗជាងនេះទៅទៀត ទៅថ្ងៃអនាគត។
ក៏ប៉ុន្តែ ពីរដ្ឋធានីវ៉ាស៊ីងតោនវិញ រដ្ឋាភិបាលអាមេរិក តាមរយៈមន្រ្តីអ្នកនាំពាក្យក្រសួងការបរទេស បានលើកឡើងថា ការពង្រឹងសម្ព័ន្ធភាព រវាងរុស្ស៊ី និងអ៊ីរ៉ង់ គឺជាការគំរាមកំហែងដ៏ធំមួយ ដែលគួរឲ្យបារម្ភ ហើយរឹតតែគួរឲ្យបារម្ភទៅទៀត ដោយសារតែផ្កាយរណបដែលរុស្ស៊ីបាញ់បង្ហោះឲ្យអ៊ីរ៉ង់នេះ គឺជាប្រភេទផ្កាយរណប ដែលអាចប្រើ នៅក្នុងការឈ្លបយកការណ៍លើដី។
គួរបញ្ជាក់ថា ផ្កាយរណបដែលរុស្ស៊ីបាញ់បង្ហោះឲ្យអ៊ីរ៉ង់នៅពេលនេះមានបំពាក់ទៅដោយកាមេរ៉ាទំនើប ដែលបើទោះជាមិនទំនើបដូចផ្កាយរណបអាមេរិក តែទំនើបជាងអ្វីដែលអ៊ីរ៉ង់ធ្លាប់មានពីមុន ហើយដែលអាចថតយករូបភាពបានច្បាស់ អាចឃ្លាំមើលទីតាំងនៅលើដីបាន។
យោងតាមទីភ្នាក់ងារអវកាសអ៊ីរ៉ង់ ផ្កាយរណបនេះនឹងត្រូវប្រើក្នុងគោលដៅស៊ីវិលតែប៉ុណ្ណោះ គឺប្រើដើម្បីឃ្លាំមើលព្រំដែន តាមដានមើលប្រភពទឹក សិក្សាអំពីគ្រោះធម្មជាតិ ក៏ដូចជា បង្កើនផលិតភាពក្នុងវិស័យកសិកម្ម។
ក៏ប៉ុន្តែ សម្រាប់អាមេរិក ផ្កាយរណបដែលមានបំពាក់ទៅដោយប្រព័ន្ធកាមេរ៉ាទំនើបប្រភេទនេះ ថ្វីដ្បិតតែអាចប្រើនៅក្នុងវិស័យស៊ីវិល តែអាចប្រើនៅក្នុងវិស័យចារកិច្ចយោធាបានផងដែរ ជាពិសេស គឺអាចឲ្យអ៊ីរ៉ង់តាមឃ្លាំមើលទីតាំងរសើបៗ នៅក្នុងទឹកដីអ៊ីស្រាអែល ក៏ដូចជា នៅតាមបណ្តាប្រទេសអារ៉ាប់ផ្សេងទៀត នៅក្នុងតំបន់ឈូងសមុទ្រពែក្ស ដែលជាគូសត្រូវរបស់អ៊ីរ៉ង់។
អ្វីដែលធ្វើឲ្យអាមេរិកកាន់តែមានក្តីកង្វល់ជាងនេះទៅទៀត គឺបារម្ភខ្លាចរុស្ស៊ីឆ្លៀតប្រើផ្កាយរណបរបស់អ៊ីរ៉ង់នេះ នៅក្នុងសង្គ្រាមអ៊ុយក្រែន។
កាលពីសប្តាហ៍មុន កាសែត The Washington Post បានចុះផ្សាយ ដោយដកស្រង់ប្រភពមន្រ្តីចារកិច្ចអាមេរិកពីររូប ដែលសុំមិនបញ្ចេញឈ្មោះថា ផ្កាយរណបដែលរុស្ស៊ីបាញ់បង្ហោះឲ្យអ៊ីរ៉ង់នេះ ក្រោយពីបង្ហោះយកទៅដាក់ក្នុងគន្លងតារាវិថីរួចហើយ អ៊ីរ៉ង់នឹងមិនទាន់អាចគ្រប់គ្រងផ្កាយរណបនេះបានភ្លាមៗនោះទេ ដោយរុស្ស៊ីគ្រោងនឹងប្រើផ្កាយរណបនេះជាបណ្តោះអាសន្ន ក្នុងរយៈពេលជាច្រើនខែ ឬក៏អាចយូរជាងនេះទៅទៀត ដើម្បីជួយបង្កើនសមត្ថភាពកងទ័ពរុស្ស៊ី ក្នុងការឃ្លាំមើលទីតាំងយោធា នៅក្នុងប្រទេសអ៊ុយក្រែន។
គួររំឭកឡើងវិញថា កាលពីខែមុន មន្រ្តីអាមេរិកក៏ធ្លាប់បានឲ្យដឹងផងដែរថា អ៊ីរ៉ង់បានស្នើផ្តល់ដ្រូនឈ្លបយកការណ៍ធុនទំនើបរបស់ខ្លួនទៅឲ្យរុស្ស៊ី ដើម្បីជួយក្នុងប្រតិបត្តិការយោធានៅអ៊ុយក្រែន ក្នុងពេលដែលរុស្ស៊ីកំពុងតែប្រឈមនឹងទណ្ឌកម្មលោកខាងលិច ហើយមិនអាចនាំចូលបច្ចេកវិទ្យាយោធាទំនើបៗបាន។
ទាក់ទងនឹងការចុះផ្សាយរបស់កាសែត The Washington Post ជុំវិញគម្រោងប្រើផ្កាយរណបអ៊ីរ៉ង់បណ្តោះអាសន្នដោយរុស្ស៊ីនោះ រដ្ឋាភិបាលរុស្ស៊ីមិនបានធ្វើអត្ថាធិប្បាយណាមួយឆ្លើយបមកវិញនោះទេ។ ក៏ប៉ុន្តែ ពីខាងអ៊ីរ៉ង់វិញ ក្រៅពីបានបដិសេធចំពោះការលើកឡើងថា ផ្កាយរណបដែលបាញ់បង្ហោះដោយរុស្ស៊ីនេះ គឺជាផ្កាយរណបស៊ើបការណ៍ ទីភ្នាក់ងារអវកាសអ៊ីរ៉ង់ក៏បានអះអាងផងដែរថា អ៊ីរ៉ង់នឹងទទួលគ្រប់គ្រងផ្កាយរណបនេះភ្លាមៗ ក្រោយពេលបាញ់បង្ហោះទៅដាក់ក្នុងគន្លងតារាវិថីរួច ដោយមិនមានការពន្យារពេលណាមួយនោះទេ ហើយថា ទិន្នន័យ ដែលបញ្ជូនពីផ្កាយរណបនេះទៀតសោត ក៏មានប្រព័ន្ធការពារសន្តិសុខយ៉ាងរឹងមាំផងដែរ ដោយមិនអាចឲ្យប្រទេសផ្សេងណាមួយចូលមើលបាននោះទេ៕
0 Comments